نبدأ كلامنا بان شاء الله
خطوات برنامجي الانتخابي الأولي هي :
1. ح الغي المرقعة أيوه المرقعة من كل أوجه الدولة يعني مرقعة اللي مش عايز يشتغل و مرقعة الدولة و رفاهيتها و مرقعة الشرطة.
2. حندخل حالة تقشف في كل البنود و باكرر كل البنود و ح أجيب ست بيت شاطرة كده تعمل لي الموازنة و خير ربنا كتير.
2. حندخل حالة تقشف في كل البنود و باكرر كل البنود و ح أجيب ست بيت شاطرة كده تعمل لي الموازنة و خير ربنا كتير.
3. أي منصب كبير و لا صغير ح يبقي بالانتخاب المباشر فورا و عليه اشراف قضائي انتوا كبرتوا بقي اتحملوا مسئولية نفسكم ح أفضل شايلاكم لغاية امتي.
4. ح أعمل جهاز رقابة و محاسبة جديد مش ح يسيب النسمة تعدي من غير محاسبة نصحي بقي نصحصح الضمير شوية و نظبط أمورنا و نشتغل و نمرة 2 و 3 متوقع يصلحوا كل مؤسسات الدولة.
5. لجان حصر لكل حاجة في البلد الناس - الشوارع - العشوائيات - الأميين - الفقراء تحت حد الكرامة و ح أشغل العاطلين في هذه اللجان ما فيش نملة ح تتحرك في البلد الا و حكومتي مسيطرة في الخير طبعا.
6. الشارع - عيني علي الشارع ح أشغل جزء من العاطلين دول في الشارع نظافة و رصف و لجان شعبية و انضباط و ده ح يرفع روحنا المعنوية و يحسسنا ان فيه حاجة اتغيرت بعد الثورة و يحفز الأمل.
7. التعليم و التوعية فورا برامج محو امية و توعية سياسية و اجتماعية في كل القنوات و ح ألغي المسلسلات و الهيافات و العاهات وغادة عبد الرازق في قنوات الدولة.
ملحوظة: أنا كتبت في المدونة علشان يبقي الخط كبير و تعرفوا تقروا علشان انتوا عارفين عمش الفيسبوك أنا باحب أريح المواطن.
و ح أوافيكم ان شاء الله بمسلسلات برنامجي الانتخابي هي دي المسلسلات الوحيدة اللي ح أسمح بها و الي لقاء.
د . داليا السباعي
المرشحة لمنصب رئيس الجمهورية الشاغر
ليست هناك تعليقات:
إرسال تعليق